ياليلة العيد انا سهران
لحد الصبح مايجينى
اراقب ضحكته الحلوة
اوضى بها رموش عينى
والم همومى واغسلها
وأطوى صفحة الأحزان
واقول بكرة اللى جاى احلى
وابشر بالصفى سنينى
*****
يا ليلة العيد بقلنا سنين
بنحسب لك ونستناك
وأعياد السنين عدت
لا دقت باب ولا شباك
وبحلم مرة ييجى العيد
احس حلاوته زى زمان
هتعمل ايه التلت ايام
ولسه القهر بجرى وراك
*****
ياشايف بكرة جاى احلا
ادينى حسبتها باليوم
تعالى نحسب الفرحة
واعد معاك انين وهموم
تلاقى الحزن متربع
على عرش القلوب حاكم
بيخطف حتى لو بسمة
ولسة الشفة جاية تقوم
ليست هناك تعليقات:
إرسال تعليق