نايـــم ف حضن الزمن والدنيا لهيــانـــى
والعمـــر منى اتفـــرط وتســــفه أيامــــى
وصحـيت على دمعتــى بمسـحها بكمامـى
القـى الزمان إتحــدف بسنـينى فـوق كتفى
ولمـا ضهرى إتحنى قمت أســنده بكفـــى
عشـمان يكـون الأجل فيــــه عمر قدامــى
*****
تــوب الشـــباب ابتلى ومعدش على قــدى
باحسب سنين عشـتها وارفـع صباع يـدى
على شـعر شـاب م الزمن وكرمشـة خدى
وأقــول يادنيا إشــمتى آدى حلمـك إتحقـق
والعمـــر أجـله إنتهى وجــداره متشـــقـق
وادى إنتى ويا الـزمن هاتشـيلى وتهـدى
*****
أنا اللـــى خـانى الـزمن ولا إنتى خنتينى؟
ولا طـــريق التقـــى يحــــرم على عينى ؟
لما الشــيطان وزنـى كنت إنتــى ردينـى
سقتينى كاسـك وقولت إن إنتى فاتنة الناس
وروحي أهي أتلوثت من الذنـوب أجنـاس
ومشــــيت ورا لذتـــك وتهت عن دينـى
*****
بينـى وبين التــراب الخطــوة وخدانــــى
وانا اللى طــول الزمن ماقــولت أاه يانى
وناسى يـوم الحسـاب وإنى أكون فانـــى
والعمر بقزف وخايف من عذاب الموت
وبأي حجة ها قـــابل صاحب الملكـــوت؟
وبأيــه يفيد الندم ولا فيش رجوع تانــى؟
ليست هناك تعليقات:
إرسال تعليق