انا هبدا القصة التانية بعد ماسمى
وادارى ف الدمع واجفف عينى بكمى
وابدر بين الصفحات حزنى وافرك همى
يمكن يشوفها اللى هايقرا ويحكى لأمى (لايكتب ولا يقرأ)
ـــــــــــــــــــــــــــــــــــــــــــــــــــــــــــــــ
عمر الغلط ع الغلط يزرع خراب الدار
والكلمة تصبح حكاية بين كل جارة وجار
يتباهوا بين بعضهم ويقلدوها الصغار
لحد يا يفتلوا بالجهل توب العار
*****
الست هانم جارتنا قال يعنى ست سبور
تتباهى قدام جرتها بلبسها المشمور
وتقول لها ادلعدى طبعا بحب عاشور
ماهو اصل جوزى المنيل مخلى عيشتى مرار
*****
وانا أصلى مدلعة ولسة بشبابى
ومهما حرج عليا ما اخرجش من بابى
هدوس على كلمته واتهنى بمنابى
واعرف طريق السعادة واشعل ف قلبة النار
*****
قالت جارتها وهى بترقع الضحكة
أنا كل يوم ألمحك وانت معاه ركبة
مش خايفة ع البنتين وف إيدهم الشبكة
دول مهما كانم بناتك والبيوت أسرار
*****
أخاف يقوم الريح والبحر يعلى عليك
وتوهى عن طرقتك والدفة مش ف ايديك
بحر الغرام غدار ما تنزليش خليك
ما تغركيش ميته لا يخدك التيار
*****
جبت لخسيس كسوته م الأصل مصنوعة
وشغلتها بالوفا وكرامة مطبوعة
ولما جار الزمن لقيتها مقطوعة
وكل فتلة وفا بدلها ظلم وخان
*****
وف يوم عريس بنتها واحد من اصحابة
عزمه ف ليلة صفا وف شقة لحسابة
وراح معاه شلته خبط على بابه
لقاها واقفة بترقص وجسمها عريان
*****
فى ايدها كاس مليان وبترقع الضحكة
هزت جدار قلبهم وتزلزل الدكة
وصحبه برقص معاها وف حضنه بملكها
دا صوت موسيقى وسمر ولا دى وقفة شيطان؟
*****
مالية دماغ الجدع ماهو صاحب الليلة
وكل كلمة بضحكة تسحبها تمييلة
ولما شافت صاحبنا قالت يادى النيلة
أيه اللى جابنى هنا دانا من بيوت تنصان
*****
فيك ألف علة وعلة وكل دا مدفون
ما دام تضيع عفتك يبقى الشرف هيهون
وكل شيئ يتغفر إلا المرة أما تخون
عارها فى صدر اهلها تاريخ بالف لسان
*****
الكل يهمس ف ودن التانى يتوشوش
أيه اللى صاب القمر ما كنا بنفرفش
ولما شافت صاحبنا وشها كرمش
والليلة باين هتقلب بالهم والأحزان
*****
قعد شرب من سكات قال يعنى مش شايف
قالولوا أيه الخبر سكرت أو خايف ؟
تعرف ياواد القمر قال مانيش عارف
بص لها بصة عبط قالت دا ايه دا كمان
*****
قال الجميل إتقمص والا ما نشبهشى
إن مش زيهم ممكن اقوم امشى ؟
قالت خلاص يا قمر خليك ما تزعلشى
متلومش ع اللى ابتلى بالكاس وبات سكران
*****
الليلة عدت مابين الضحكة والرقصة
وكاس ملاه الألم وعيون عليه باصة
بقى هو ساكت وعملت نفسها خارسة
وفكروه ابتلى وبحبها ولهان
*****
إن كان عشان الورد لازم ينسقى العليق
هدوس على وردتى أنا واكسر الأبريق
واربط فؤادى ف حجر وارميه ف بحر غريق
واحدف وراه بلوتى علشان معدش يبان
*****
وخشت البيت ساعة الفجر مابيدن
وجوزها قاعد بيغلى منخيره بيدخن
ساعة ماشاف وشها بص لها واتمعن
وقال قليلة الأصل لازم كل يوم تنهان
*****
قالت ياشيخ إتلهى يعنى انت ناقصك أيه ؟
أديك بتاكل وتشرب وكل شيئ تلاقيه
وشوف بقى كام سنة ما دخلش بيتنا جنيه
نايم على فرشتك خمس سنين عيان
*****
توكنش فاكر معاشك يكفى حتى علاج ؟
ولا انت فاكر خروجى محبة فيه ومزاج ؟
ان كنت رافض خروجى ماتخلنيش أحتاج
وكفى بيتك وجهز بناتنا للعرسان
*****
غمض عنيه وقالها ياصاحبة العفة
الناس لها الظاهر ولا انتى مش عارفة
تصونى جوز حضرتك لو عضم ف القفة
وتلمى عرضه اللى خايف تلطخيه بقطران
******
قالت ياشيخ إتخمد خلّينى رخرة أنام
ما كنت قاعد وساكت ما بتنحشر ف كلام
سكت وقال غلطتى وهاسيبها للأيام
واللى وقع ف الحطب مسيره تاكله النار
*****
الريح مادام إتعكس والموج بدأ يكنف
لم الشراع وابرمه مش عيب لو اتكتف
واعدل قوام مركبك وشدها وقدف
واعرف طريق طرقتك ما تخفش م التيار
*****
قاعد عريس بنتها قلقان وبيفكر
يقول أكيد بنتها زى امها واكتر
وانا اللى عامل مفتح وأشد من عنتر
أنزل على خلقتى م الوحل اشيل قنطار
*****
الشمس طلعت وفردت شعرها ع الكون
شق النهار صدرها وف حضنها مركون
وحماته نايمه وفاكرة سرها مدفون
صحيت على خبطته يلعب ف صدرها فار
*****
راحت بتجرى على الأكرة وهيه محدوفه
بص ف عنيها اترخت قال يعنى مكسوفة
قبل السلام قالها الشبكة ملفوفة ؟
ماهو كل شيئ إنتهى وربنا ستار
*****
بصت وقالت ماتقعد تشرب القهوة
ووطى حسك لابنتى تخش على سهوة
وحياتك إنت دى بنتى ما كان لها دعوة
والغلطة دى غلطتى وبناتى دول أحرار
*****
ياست هانم خلاص أنا جاى ومصمم
وكفاية اشوف عملتك واسكت ولا اتكلم
انا برده زى البشر بحس واتألم
خشت عليه بنتها وسامعة كل الحوار
*****
لمت بإيدها الدهب وقالت له عندك حق
ياما سمعت كتير واكتم ف قلبى واطق
مادمت شوفت بعنيك يبقى اللى بينا إتشق
وادى كمان شبكتك ومافيش لزوم تحتار
*****
خربت على بنتها والبنت مظلومة
والبنت من حزنها م الأكل محرومة
شهرين على فرشها نايمة ومسقومة
راحت ضحية وخطفها عزرائل بالموت
*****
مرت ليالى الحزن واتنست الدموع
والفاجرة نار العشق قادت فى الضلوع
قالت لجوزها أنا رايحة شغلى أحسن نجوع
من امتى كان الحزن بيعمر بيوت ؟
*****
البنت ردت والدموع حايشة الكلام
ما كفاكيش اللى راح والله يامة حرام
عايزانى أضيع زيها ما جازشى فيكى علام ؟
عرفت يامة الحقيقة معدش ينفع سكوت
*****
سحبت بإيدها البنية وقالت لها جرى أيه ؟
ما تكنش امك سفيرة ولا انتى بنت البيه ؟
ما توطى حسك يا فالحه والسر دارى عليه
لا ابوك يدعبس ورايا ويكشف المكبوت
*****
فكراك تدارى على امك وترحمى أسايا
أيه يعنى نظرة وضحكة عملتيها حكاية
وانا اللى لسة برتب تيجى ويايا
ماتحبكيش الحكاية خلى الليالى تفوت
*****
وبخّت السم وشربت بنتها منه
عرفت طريق العشق واتعلمت فنه
وبنظرة حلوة وضحكة وشعرها تلمه
يبقى عليه العوض اللى ف طريقها يفوت
*****
شافها إبن راجل غنى وهى ماشية تدلع
فضل قاطرها ونار الحب بتولع
بصت له واتبسمت قام هو متوجع
قالت له دمك تقيل راح مختشى وملفوت
*****
وقفت تسبخ وتحدف دبش بلسانها
حضر فتوة ودب خناقة علشانها
إتلمت الحتة رجاله ونسوانها
وخلصوه من إديه وأكل له كام شلوت
*****
قعد يفكر ف حاله منكوى ومغلول
كليت دا يحصل عشانها بقى هو دا معقول؟
أكيد دى بنت البلد عفيفة بنت أصول
تبات وتصبح نصيبى لو كلت ميت نبوت
*****
فضل يدور ويسأل وعرفها ف الأخر
خطبها من أمها لما التانى إتاخر
جهزها من كل شيئ وعفش م الفاخر
مكتوب ف قايمة ومضاها وكل شيئ مثبوت
*****
يافرحتك ياعريس طول ما انت ف الزفة
إوزن ياغاوى الجمال وطبب الكفة
غرك جمال القوام طيب فين العفة ؟
بكرة تدوق مرها لما الحلاوة تدوب
******
البت بعد الجواز أمها ارتاحت
قالت قطيعة بنات غمة وانزاحت
كانت تقطع عليا وزباينى أهى راحت
خلينى ارتب أمورى واشوف أيه المطلوب
*****
طب واللى قاعد ولازق فى الفرش متنيل ؟
ولا جارتنا اللى صابحة تبص وتخيل ؟
لازم أجيب رجلها وأخليها ترييل
لما تشوف الفلوس ولو فى إيدى كركوب
*****
الأفعى بخت سمومها بالحيلة والتزيف
ملت دماغ المرة باعت الشرف برغيف
فرشوا الشقق للدلع وكل يوم كام ضيف
وسعات يباتوا حداها دا لما جوزها يغيب
*****
أما العريس فى العسل ينزح ويشرب فيه
ومراته راحت لبوها شافت هناك كام بيه
وقفت تسلم عليهم والكل ملى عنيه
مش عارفة أيه الحكاية قالت أمها محاسيب
*****
واحد خفيف الظل بهمس وبيعاكس
خمسين جنيه لفهم وف صدرها دافس
مسكها من كتفها قالت الجميل آنس
رفعت إديه من عليها وقالت ياراجل سيب
*****
فضلت تفلفص فى إيده والتانى راخر قام
مسكها من وسطها عطيته بالاقلام
قامت تحوشها إمها وقالت لها ياسلام
ماتلمى نفسك يابيضة لاهو حد غريب
*****
وابوها قاعد فى قوضته مش دارى بالحاصل
نايم على فرشته يحلم ويتفائل
خشت عليه بنتها تهرب من الراجل
دخلت وراها إمها علشان خاطرها يطيب
*****
أنا كنت فاهمة بأن إنتى اللى هتوفقى
وقولت دى رغبتك هاتصاحبى وترافقى
علشان كدا قولت لك قومى قدمى واسقى
يمكن يكون لك معايا ف السعادة نصيب
*****
قالت معايا الجمال والمال مطمعنى
وخدت راجل غنى علشان يمتعنى
لكن فين السعادة قوم يابا واسمعنى
جبتونى ليه للتعب والهم والتعذيب
*****
أبوها سامع وخانس لما يشوف الحوار
ولما قام واتعدل قلبوا الحقيقة هزار
وقال ف باله ياويلى طلعت أكبر حمار
الخاينة باعت شرفها وعايزة بنتى تخيب
*****
مثل عليها العبط وقال لها إسقينى
وانتى يافلقة قمر تعالى غطينى
عشرين سنة عشتهم عمرك ما خنتينى
قالت له بس أما تشرب قال ما بنتك تجيب
*****
ضحك وقال كام سنة محصلش بينا حنان ؟
ونفسى قبل أما اموت تاخدينى بالأحضان
وحاش بايده الطبق فيه قشر م الرمان
مالت عليه بكتفها مش عارفة أيه فى الغيب
*****
المطوة فوق الطبق حامية بتتلمض
ميل عليها وسحبها وهى بتغمض
وقال ياخاينة الشرف عمره ما يتعوض
ومسكها من شعرها وضربته ما تخيب
*****
ضيعتى شرفك ياخينة وعايزة بنتى تضيع
وكل ما أسالك بتفتلى ف مواضيع
أكمنى عاجز فى فرشى قولتى الراجل دا وقيع
خمس سنين عشتهم شرفى ملطخ طين
*****
المطوة تغرز وتطلع والدم غطى السرير
ولما صوتها اتقطع بدل نافسها شخير
دخلت تحوش بنتها كان لسة آخر زفير
طلع ف آخر لقا وبرقوا العنتين
*****
لطمت على وشها وصريخها لم الجيران
منهم جارتها اللى طالها الوحل والقطران
كشت وقالت فى بالها ياما خسرت نسوان
وكانت لى عبرة ولكن عدونى م الخاينين
*****
هلم نفسى واحاول أصلح المكسور
وامسح بإيدى الغلط واعيش بقى ف النور
أحسن أتوه زيها وأطب فى المحظور
دى السترة وسط البشر ما تقضهاش ملايين
*****
وبعد قتل المرة جوزها حصل له جنان
والخانكة زادت نفر مشلول بربع لسان
والبنت جوزها سمع عن مسخرة وهزيان
وعشانه بيحبها بيقول هسيبها لمين ؟
أزال المؤلف هذا التعليق.
ردحذف